അവളെ കണ്ടപ്പോഴേ മനസ്സിൽ ലഡ്ഡു പൊട്ടി. ഇടതു നെഞ്ചിൽ ഒരു ലൗവ്വിന്റെ ഹോർമോൺ കിടന്നു ഇടിക്കുന്നുണ്ടോ എന്നൊരു സംശയം…?

ഒരു നാൾ വരും – രചന: അരുൺ കാർത്തിക്

“ജീവിതത്തിൽ പരാജയപ്പെട്ടവന്റെ കഥകൾ കൂടി കേൾക്കണം…വിജയിച്ചവനേക്കാൾ ഒരുപാട് പറയാനുണ്ടാവും അവർക്ക്…”

ഒരിക്കൽ ഒരാൾ എന്നോട് ഇങ്ങനെ പറഞ്ഞു, എന്തിനാണ് ഇങ്ങനെ പറഞ്ഞത്…? അറിയില്ല…

അതു പോട്ടെ…ഈ പ്രണയം എന്നു പറയുന്നത് പഴത്തിന്റെ തൊലിയുരിഞ്ഞു കളയുന്നത് പോലെ നിസ്സാരമായ കലയാണെന്ന് കുറച്ചു വൈകിയാണ് ഞാനറിഞ്ഞത്. അറിഞ്ഞു വന്നപ്പോഴേക്കും പെണ്ണ് കെട്ടാൻ പ്രായവുമായി.

അറിയാവുന്നവളുമാരെല്ലാം തേച്ചിട്ടു പോയി. പിന്നെ കൊടുത്താൽ കൊല്ലത്തും കിട്ടും എന്നറിയാവുന്നത് കൊണ്ടു എനിയ്ക്കൊട്ടു വിഷമവുമില്ല.

സ്ത്രീകളും പ്രണയവും ഇല്ലാത്ത ലോകത്തു ഇനി പുരുഷാധിപത്യത്തോടെ വിരാജിക്കണമെന്നു ആലോചിച്ചിരിക്കണ സമയത്താണ് എന്റെ ചേട്ടനു കെട്ടു പ്രായമായെന്നു ഞാനറിഞ്ഞത്. എങ്കിൽ പിന്നെ ഒട്ടും കുറയ്ക്കണ്ട…പോയി ചായയും ബിസ്കറ്റ് കഴിച്ചു ഇത്തിരി ജാഡയൊക്കെയിട്ട് വരാമെന്നു കരുതി ഏട്ടന്റെ ഒപ്പം പെണ്ണുകാണാൻ പോയി.

മിണ്ടാപ്പൂച്ച കലമുടയ്ക്കും എന്നു പറയണ പോലെ ഒരു പെണ്ണിന്റെ മുഖത്തു പോലും നോക്കാത്ത ഏട്ടൻ, പെണ്ണു കാണാൻ ചെന്ന വീട്ടിലെ പെണ്ണുമായിട്ട് നേരത്തെ തന്നെ ഒടുക്കത്തെ പ്രേമത്തിലായിരുന്നുവെന്ന് പോകുന്ന വഴിക്കാണ് ഞാൻ അറിയുന്നത്.

ഇതെങ്ങനെ ഒപ്പിച്ചു എന്നു ചോദിച്ചപ്പോൾ, ഫേസ് ബുക്ക്‌ വഴി സംഭവിച്ചതാണത്രേ…

ബാക്കിയുള്ളവൻ fb യും വാട്ട്സ് ആപ്പും ഇൻസ്റ്റഗ്രാമും തുടങ്ങി എല്ലാത്തിലും അക്കൗണ്ട് എടുത്തു രാത്രി പോലീസ് ചെക്കിങ്ങിനിറങ്ങുന്നത് പോലെ ഒരാളേലും ലൈനിൽ ഉണ്ടോന്നു ഉറക്കമിളച്ചിരുന്നത് വെറുതെയായി.

എന്തായാലും ബ്രോയ്ക്ക് കട്ട സപ്പോർട്ടുമായി ഞാനും കൂടി. ഏടത്തിയെ കണ്ടു. ഇഷ്ടമായി, ആള് കുറച്ചു പൊക്കം കുറവാണേലും ഒരുപാട് കണ്ടു പഠിക്കാനുണ്ടെന്ന് മനസ്സിലായി. ഏട്ടന്റെ കാര്യം അമ്മയോട് പറഞ്ഞു ഏറെക്കുറെ സമ്മതിപ്പിച്ചു ചായയും ബിസ്കറ്റും കഴിക്കുമ്പോഴാണ് അവൾ വരുന്നത്…