ഒൻപതാം ഭാഗം വായിക്കാൻ ക്ലിക്ക് ചെയ്യൂ..
എന്താ നീ പറഞ്ഞത്…ദേവ് വിശ്വാസം വരാത്തപോലെ ചോദിച്ചു.
ചേട്ടായിക്ക് എൻ്റെ ചേച്ചിയെ കല്യാണം കഴിച്ചു കൂടെ എന്ന്…ഞാൻ പറഞ്ഞത് തെറ്റാണോ…എനിക്ക് ശരിയെന്നു തോന്നി.
ദേവ് ശരിയെന്നോ…തെറ്റെന്നോ പറഞ്ഞില്ല. എന്തു മറുപടി കൊടുക്കും…മുതിർന്നവർ ആരെങ്കിലും ആരുന്നെങ്കിൽ മറുപടി കൊടുക്കാരുന്നു. ഇവനോടു പറഞ്ഞാൽ കുഴപ്പമാവും. എന്തു പറയും.
ചേട്ടായി എന്താ മിണ്ടാത്തെ…ശരത് അക്ഷമനായി.
നീ പറഞ്ഞാൽ ഇവിടെ ആരേലും വിലവെക്കുമോ…?
വിലവെക്കും എൻ്റെ ചേച്ചി…ചേട്ടായിക്ക് എൻ്റെ ചേച്ചിയെ ഇഷ്ടമാണോ, അതു പറഞ്ഞാൽ മതി. ശരത്തിന്റെ വാക്കുകളിൽ പിണക്കം സ്പഷ്ടമായി.
ഇഷ്ടമാണെങ്കിൽ…?
ആണെങ്കിൽ ചേട്ടായിയേ എൻ്റെ ചേച്ചിയെ കെട്ടൂ…
ശരത്, നിൻെറ ചേച്ചി സമ്മതിക്കേണ്ടേ…?
സമ്മതിക്കും. അതിനൊക്കെ വഴിയുണ്ട്…
എന്തുവഴി…അമ്മാവൻ സമ്മതിക്കുമോ നീ പറഞ്ഞാൽ…
അതൊന്നും ചേട്ടായി അറിയേണ്ട..ചേട്ടായി അവരുടെ അടുത്തേക്ക് പൊക്കോ ഞാൻ ചേച്ചിയുടെ അടുത്തോട്ട് പോകുവാ…ശരത് അച്ചുവിൻ്റെ അടുത്തേക്ക് ഓടിപ്പോയി.
ശരത് മിടുക്കൻ ആണ്. എങ്ങനെയാവും ബാക്കി കാര്യങ്ങൾ. മനസ്സിൽ ശുഭപ്രതീക്ഷ തോന്നാൽ തുടങ്ങി.
എല്ലാവരും കൂടി എന്താവും തീരുമാനം എടുക്കുക. ഇത് നടത്താനാണ് പ്ലാനെങ്കീൽ അച്ചു ഈ ജീവിതം അവസാനിപ്പിക്കും. കരഞ്ഞിട്ട് ഒന്നും നേടാനില്ല. ദേവേട്ടനും അപ്പച്ചിയും ഉണ്ട്. അവർ എന്താവും തീരുമാനിക്കുക. അച്ഛനോട് യോജിക്കുമോ…ഏയ് അങ്ങനെ ചെയ്യില്ല. ദേവേട്ടൻ എന്തേല്ലും മാർഗം കാണും. അച്ചു ഓരോന്നാലോചിച്ച് ശരത്തിന്റെ മുറിയിൽ ഇരുന്നു.
ചേച്ചീ…ചേച്ചീ…ഒരു കാര്യം പറയാനുണ്ട്.
എന്താടാ…അവർ തീരുമാനിച്ചത്.
അതെനിക്കറിയില്ല. ഞാൻ തീരുമാനിച്ചത് പറയാം.
നീയോ…നീ എന്തു തീരുമാനിക്കാൻ…?
ഞാൻ ചോദിക്കുന്നതിന് മറുപടി താ…ചേച്ചിക്ക് ദേവേട്ടനെ കല്യാണം കഴിച്ചുടെ…
അച്ചു ഞെട്ടിപ്പോയി. ഇവൻ എങ്ങനെ അറിഞ്ഞു തങ്ങൾ സ്നേഹത്തിലാണെന്ന്. ഈശ്വരാ അപ്പച്ചി അച്ഛനോട് പറഞ്ഞോ…എന്നാൽ എല്ലാം തീർന്നു. നിന്നോട് ആരാ പറഞ്ഞത്…?
ആരും പറഞ്ഞില്ല. ചേച്ചിക്ക് ഇഷ്ടാണോ…?
ഇഷ്ടാന്നു പറഞ്ഞിട്ട് എന്തുകാര്യം. നടക്കില്ലല്ലോ…
ഇഷ്ടാണോ എന്നു മാത്രം അറിഞ്ഞാൽ മതി. അച്ചുവിൻ്റെ മുഖം നാണത്താൽ കുനിഞ്ഞു. പറ ചേച്ചി, എന്നിട്ടുവേണം ബാക്കി കാര്യങ്ങൾ. അച്ചു തലയാട്ടി.
ശരത്, ദേവേട്ടൻ…?
സമ്മതിക്കുമോന്നല്ലേ…അത് ഞാൻ ചോദിച്ചു. ദേവേട്ടന് സമ്മതമാ. അതല്ലേ ചേച്ചിയോടു ചോദിക്കാൻ വന്നത്. അത് കേട്ടിട്ട് അച്ചുവിൻ്റെ കണ്ണു നിറഞ്ഞു. ചേച്ചിക്ക് ഇഷ്ടമില്ലാത്ത ആളെകൊണ്ട് കെട്ടിക്കാൻ ഞാൻ സമ്മതിക്കില്ല. എൻ്റെ ചേച്ചി സന്തോഷത്തോടെ ജീവിക്കുന്നത് എനിക്ക് കണ്ടാൽ മതി….ശരത് അവളുടെ കണ്ണുനിർ തുടച്ചു.
ശരത് എനിക്ക് ദേവേട്ടനെ ഒന്നു കാണണാരുന്നു.
ഞാൻ പറഞ്ഞിട്ട് വിശ്വാസം ആയില്ലേ…
വിശ്വാസം ആണ് എന്നാലും…ശരി ഞാൻ പറയാം. ശരത് അവരുടെ അടുത്തേക്ക് നടന്നു.
അപ്പോൾ എല്ലാം പറഞ്ഞപോലെ, അടുത്ത ഞായറാഴ്ച അങ്ങോട്ടു പോകാം…ശശി പറഞ്ഞു.
വസൂ…നീയൊന്നും പറഞ്ഞില്ല…സുകു പറഞ്ഞു.
ഓപ്പെ ഞാൻ എന്താ പറയേണ്ടത്.
അതെന്താ…നീ അപ്പച്ചി അല്ലേ…നിനക്കും അവകാശമുണ്ട് അവളുടെ കാര്യത്തിൽ.
എൻ്റെ അവകാശം ഞാൻ ചോദിച്ചാൽ…ബാക്കി പറയാതെ വസുധ നിർത്തി.
എന്തവകാശം…ശശി ചോദിച്ചു.
അത് ഞാൻ ചോദിച്ചാൽ ഓപ്പ വീണ്ടും പിണങ്ങും. അത് ഞാൻ ആഗ്രഹിക്കുന്നില്ല. സുകുവിനു കാര്യം മനസിലായി. സുകുവിൻ്റെ മുഖഭാവത്തിൽ നിന്നും വസുധ മനസിലാക്കി.
ഇനി പിണക്കമൊന്നും വേണ്ട. പിണങ്ങാനുള്ളത് പറയാതിരിക്കുക…ശശി പറഞ്ഞു.
ശരത് വന്നപ്പോൾ തീരുമാനം എടുത്തു കഴിഞ്ഞിരുന്നു. അച്ഛാ…എനിക്കൊരു കാര്യം പറയാനുണ്ട്.
എന്താടാ…ഇവിടുത്തെ തിരുമാനം വല്ലതും നീ അറിഞ്ഞോ…ഞായറാഴ്ച എല്ലാവരും ചെറുക്കൻവീടു കാണാൻ പോകുന്നു…ശശി സന്തോഷത്തോടെ പറഞ്ഞു.
ഞാൻ വരുന്നില്ല…
നീയല്ലേ പോയി കാണേണ്ടത്…
എനിക്കിഷ്ടമല്ല ആ കല്യാണം….
അതു കൊള്ളാലോ സുകുവേട്ടാ…ശരത് അരിശപ്പെട്ടു ഇറങ്ങിപ്പോയി. സുകുവേട്ടാ ആദ്യം അവനെ പറഞ്ഞു മനസിലാക്ക്. എന്നിട്ട് വിളിച്ചു പറഞ്ഞാൽ മതി. ഇപ്പോൾ ഇറങ്ങട്ടെ…കുറെ കാര്യങ്ങൾ ഉണ്ട്. വിളിച്ചോളു സുകുവേട്ടാ വന്നേക്കാം. സരസൂ വാ ഇറങ്ങാം.
ഓപ്പെ ഞങ്ങളും ഇറങ്ങുന്നു…വസുധ പറഞ്ഞു. ചേട്ടായി ഒന്നു നിൽക്കൂ…ശരത് ദേവിനടുത്തെത്തി. എനിക്കു തന്ന വാക്ക് മാറല്ല്. ഞാൻ ചേച്ചിയോടും പറഞ്ഞു ചേച്ചിക്ക് സമ്മതമാണ്…ശരത് ദേവിനുമാത്രം കേൾക്കാവുന്ന സ്വരത്തിൽ പറഞ്ഞു.
മാറില്ല, നിൻ്റെ ചേച്ചിയോടും പറയ് ദേവിന് ഒരു വാക്കേ ഉള്ളെന്ന്…ശരത്തിനു സന്തോഷമായി. എല്ലാവരും പോയി…മുറിയിൽ സുകും ലളിതയും മാത്രം.
ലളിതേ എന്തോ ഒരു വിഷമം ഉണ്ട് .നമ്മൾ തെറ്റായ തീരുമാനം ആണോ എടുത്തത്. അല്ല സുകുവേട്ടാ…അവൾ ഇഷ്ടമില്ലെന്നു പറഞ്ഞില്ലല്ലോ, പഠിക്കണം എന്നല്ലേ പറഞ്ഞുള്ളൂ…ആവശ്യമില്ലാത്തതൊന്നും ചിന്തിക്കേണ്ട.
ശരത്തിന് ഇഷ്ടമില്ലാന്നു പറഞ്ഞു. ഇത്രയും നാളും ചെറിയ കുട്ടിയാണെന്ന് കരുതി. അതിനാൽ അവനോട് ആലോചിച്ചില്ല.
അവൻ പറയുന്നത് കാര്യാക്കേണ്ട…
അതെന്താ അമ്മേ അങ്ങനെ…ഞാൻ അറിയേണ്ടേ…ഞാനല്ലേ ഉള്ളൂ സഹോദരൻ ആയിട്ട്…അവർ പറഞ്ഞത് കേട്ടോണ്ടുവന്ന ശരത് ചോദിച്ചു.
ശരത്, ഇത് പിള്ളേരു കളിയല്ല. മുതിർന്നവർ തീരുമാനിക്കേണ്ട കാര്യമാണ്…ലളിത പറഞ്ഞു.
തീരുമാനിച്ചോളൂ. ഞാനും ചേച്ചിയും ഉണ്ടാവില്ല. ഇനി എന്തുവേണേലും ആയിക്കൊ…ശരത് മുറിയിൽ നിന്നും ഇറങ്ങിപ്പോയി.
കാർ ഡ്രൈവ് ചെയ്യുന്നതിനിടയിൽ ദേവ് പാട്ട് മൂളിക്കൊണ്ടിരുന്നു. വസുധ ശ്രദ്ധിച്ചു. ദേവ് സന്തോഷത്തിലാണ്. അങ്ങോട്ടു പോയ ആളല്ല.
ദേവ്, എന്താ ഇത്ര സന്തോഷം…
കാര്യങ്ങൾ നമ്മുടെ വഴിക്കുവരുന്നമ്മേ…
ഞായറാഴ്ച പോകാൻ തീരുമാനിച്ചത് എങ്ങനെ നമ്മുടെ വഴിക്കാകും തെളിച്ചു പറയ്…
അമ്മേ നിങ്ങൾ അമ്മാവൻ്റെ മുറിയിൽ ഇരുന്നപ്പോൾ ശരത് വന്ന് എന്നെ വിളിച്ചില്ലേ…വിളിച്ചു…അവൻ ചോദിച്ചു, അവൻെറ ചേച്ചിയെ കല്യാണം കഴിച്ചുകൂടെ എന്ന്…
ആഹാ..കൊള്ളാലോ…അല്ലേലും അവൻ മിടുക്കനാ. കണ്ടാലേ അറിയാം. ഓപ്പയുടെ തനി പകർപ്പാണ്. തീരുമാനിച്ചത് നടത്തും. അപ്പോൾ നമ്മൾ പാതി വിജയിച്ചു. ബാക്കി കാര്യങ്ങൾ നമ്മളെ തിരക്കി വരും അല്ലേ ദേവ്…
അതെ അമ്മേ, എല്ലാം മഹാദേവൻ്റെ അനുഗ്രഹം. കാലങ്ങൾക്കുശേഷം വസുധയുടെ ചുണ്ടിലും മൂളിപ്പാട്ട് വിരിഞ്ഞു.
*** *** ***
ലളിത അടുക്കളയിൽ തിരക്കിട്ടു പണിയാണ്. അതുകണ്ടിട്ട് ശരത് സുകുവിൻ്റെ മുറിയിൽ ചെന്നു. അമ്മയുണ്ടെങ്കിൽ ഒന്നും പറയാൻ പറ്റില്ല. അച്ഛാ…അച്ഛാ…
ഉംം..എന്താടാ…?
എനിക്കൊരു കാര്യം പറയാനുണ്ട്.
ശരി…സുകു എണീറ്റിരുന്നു.
അത് നമുക്ക് ചേച്ചിയെ ദേവേട്ടനെകൊണ്ട് കെട്ടിക്കാം…ഞാൻ പറഞ്ഞത് കേട്ടില്ലേ…
കേട്ടു…
എന്നിട്ടെന്നാ മിണ്ടാത്തെ…
കാര്യങ്ങൾ തീരുമാനിക്കാൻ ഇവിടെ മുതിർന്നവർ ഉണ്ട് ശരത്.
അച്ഛന് വസു അപ്പച്ചിയെ വിട്ട് ഇത്രയും കാലം ജീവിക്കാൻ പറ്റും. എന്നാൽ എനിക്കെൻ്റെ ചേച്ചിയെ വിട്ട് ഒരു ദിവസം പറ്റില്ല. എൻ്റെ ചേച്ചി സന്തോഷത്തോടെ വേണം ഇവിടെ നിന്നുപോകാൻ. അതുപോലെ എനിക്കും സന്തോഷത്തോടെ ചേച്ചിയുടെ അടുത്ത് കേറിച്ചെല്ലണം…
സുകുവിൻ്റെ മുഖം കുനിഞ്ഞു. തെറ്റുകൾ രണ്ടുപേരും ചെയ്തു ശരത്. ഇനി ആലോചിച്ചിട്ടു ഒരു കാര്യവും ഇല്ല.
അച്ഛന് ഇപ്പോഴും വസു അപ്പച്ചിയോട് പിണക്കം ആണോ…
അല്ലടാ, അവൾ വന്നല്ലോ ആ സന്തോഷത്തിലാ ഞാൻ. അവൾ ഈ വീടിന്റെ വിളക്കാരുന്നു. നീ പറഞ്ഞതിനേപ്പറ്റി ഇപ്പോൾ ആലോചിക്കേണ്ട. മുതിർന്നവരുടെ തീരുമാനം പോലെ നടക്കും…സുകു തീർത്തു പറഞ്ഞു. ബന്ധത്തെ ബന്ധം ഏച്ചുകെട്ടേണ്ട…മനസിലായോ നിനക്ക്. നീ പോ എനിക്കൊന്നുറങ്ങണം…
ഉറങ്ങിക്കോ ഞാൻ പോകുന്നു…ശരത് മുറി വിട്ടിറങ്ങി. നേരേ ലളിതയുടെ അടുത്തെത്തി. എന്നാടാ…ആകെ അരിശത്തിൽ ലളിത ചോദിച്ചു. അരിശംകൊണ്ട് അവൻ്റെ മുഖം ചുവന്നിരുന്നു. ഒന്നുമില്ല…അറിഞ്ഞിട്ടും കാര്യമില്ല. സ്വന്തം ഇഷ്ടം മറ്റുള്ളവരിൽ അടിച്ചേൽപിക്കുകയല്ലേ ഇവിടെ…?
അതാരാ അങ്ങനെ ചെയ്തത്…?
ആരാന്ന് അമ്മയാക്കറിയില്ലേ…?
എന്താ അടിച്ചേൽപിച്ചത് അതു പറ.
ഇവിടെ ഒരു കല്യാണക്കാര്യം നടക്കുന്നില്ലേ.
ഉണ്ട്. അതിനെന്താ…?
ഓരോന്നിനും അതിൻ്റേതായ സമയം ഉണ്ട്. അപ്പോൾ നടക്കണം. നിൻ്റെ ചേച്ചിക്ക് കല്യാണപ്രായമായി.
ആയെങ്കിൽ കെട്ടിക്കണം…ചേച്ചിയുടെ ഇഷ്ടം അനുസരിച്ച്. അല്ലാതെ…ബാക്കി ശരത് പറഞ്ഞില്ല.
അവൾക്ക് ഇഷ്ടമില്ലെന്നു പറഞ്ഞില്ല. നിന്നോടു പറഞ്ഞോ ഇഷ്ടമില്ലെന്ന്…പറഞ്ഞു. എനിക്കും ഇഷ്ടമല്ല….ഓഹോ…അപ്പോൾ രണ്ടുപേരും ഒത്തോണ്ടാണ്. നടക്കില്ല മക്കളെ. ഈ കല്യാണം നടത്തും. ആരെതിർത്താലും. നീ ഓരോന്നുപറഞ്ഞ് അവളെ വഷളാക്കേണ്ട. അത്രേ എനിക്ക് പറയാനുള്ളൂ.
അമ്മേ ഈ വാശി ശരിയല്ല. ചേച്ചീടെ ജീവിതമാണ്. ആലോചന തുടങ്ങിയതല്ലേ ഉള്ളൂ…വേണ്ടെന്നു വെക്കാലോ…
ഇതുപോലൊന്ന് ഒത്തുകിട്ടണ്ടേ. ആദ്യമായി വന്ന ആലോചന. എല്ലാം കൊണ്ടും നമുക്ക് ചേരും.
നമുക്കു ചേരുമായിരിക്കും എന്നാൽ ചേച്ചിക്ക് ചേരില്ല.
ആഹാ…അതു നീയാണോ തീരുമാനിക്കുന്നത്. മോൻപോയി ഇതിലും നല്ലത് കൊണ്ടുവാ…ലളിത തമാശയായി പറഞ്ഞു.
കൊണ്ടുവരും. അമ്മ കണ്ടോ. അപ്പോൾ പറ്റില്ലാന്നു പറഞ്ഞാലാ…
ഞാൻ ഈ ചൂടുവെള്ളം അച്ഛന് കൊടുത്തിട്ടു വരട്ടെ…എന്നിട്ട് ചെറുക്കനെ തപ്പി പോയാൽ മതി…ലളിത പറഞ്ഞു. ലളിത ചെല്ലുമ്പോൾ സുകു കണ്ണടച്ചു കിടക്കയാരുന്നു.
സുകുവേട്ടാ…സുകുവേട്ടാ…ലളിത തോളിൽ തട്ടി വിളിച്ചു. ഉറങ്ങുവല്ല ലളിതേ…ഉറക്കമൊക്കെ നഷ്ടപ്പെട്ടു. ഒന്നുംഅങ്ങോട്ട് ശരിയാവുന്നില്ലാ എന്നായി. കാഴ്ചക്കാരൻ മാത്രം ആകേണ്ടി വരുന്നു. വാക്കുകൾക്ക് പഴയ ശക്തിയില്ല. തീരുമാനങ്ങൾക്ക് ഉറപ്പില്ല…
എന്താ ഇങ്ങനൊക്കെ പറയാൻ…അതിനുതക്ക എന്തുണ്ടായി…
ശരത് ഈ കല്ല്യാണത്തിന് സമ്മതിക്കില്ല. കൂടാതെ വേറൊന്നുകൂടിയും പറഞ്ഞു. ആൺമക്കൾ തന്നോടൊപ്പമായാൽ അവരെ അംഗീകരിക്കണം എന്നല്ലേ…ശരത്തിനെ നമ്മൾ കുട്ടിയായി കണ്ടു. എന്തൊക്കയാ ഈ പറയുന്നത്.
അവനെന്താ പറഞ്ഞത്…
നമ്മുടെ വസൂൻ്റെ മോനെക്കൊണ്ട് അച്ചൂനെ കെട്ടിച്ചാൽ മതിയെന്ന്. അതാ അവനിഷ്ടം എന്ന്. നീ പറ ലളിതേ…എന്താ നിൻ്റെ അഭിപ്രായം.
സുകുവേട്ടൻ്റെ അഭിപ്രായം എന്താ…അതുതന്നെയാണ് എൻ്റെ അഭിപ്രായം.
സത്യം പറഞ്ഞാൽ വസൂൻ്റെ മോനെ കണ്ടപ്പോൾ മനസ്സിൽ അങ്ങനൊരു മോഹം തോന്നിയതാ. പിന്നെ ഓർത്തു അതിനുള്ള അർഹത നമ്മൾ എന്നേ കളഞ്ഞു എന്ന്. ഞാൻ അങ്ങനാവശ്യപ്പെട്ടാൽ അവൾ എന്നെ ആട്ടും…അതുകൊണ്ട് ആ ആഗ്രഹം അതുപോലെ ഉപേക്ഷിച്ചു. ഇപ്പോൾ ശരത് പറയുന്നത് ദേവ് മതീ എന്ന്. വേറെ കല്യാണം നടത്തിയാൽ അവനും അച്ചുവും ഉണ്ടാവില്ലെന്ന്.
സുകുവേട്ടൻ അവൻ പറയുന്നത് കാര്യാക്കേണ്ട…അരിശത്തിനു പറഞ്ഞതാവും…ലളിത സുകുവിനെ സമാധാനിപ്പിച്ചു.
ശരത് തൻെറ ഒപ്പം ആണ് എന്നത് അച്ചൂന് വലിയ ആശ്വാസമായി. അവൻ എന്താവും അച്ഛനോട് പറഞ്ഞിട്ടുണ്ടാവുക. അച്ചു ശരത്തിനെ നോക്കിയിരുന്നു. വരുന്നുണ്ട്. മുഖം കണ്ടാലേ അറിയാം, കലിപ്പിലാണെന്ന്. ശരത് വന്ന് അവളുടെ അടുത്തിരുന്നു. രണ്ടുപേരും കുറച്ചുനേരം ഒന്നുംമിണ്ടിയില്ല.
ശരത്, അച്ഛൻ എന്തു പറഞ്ഞു….അച്ചൂന് ചോദിക്കാതിരിക്കാൻ കഴിഞ്ഞില്ല.
അതൊന്നും ചേച്ചി അറിയേണ്ട. ഞാനുണ്ട്, ദേവേട്ടനുണ്ട്. ഇനി ഇവരാരും സമ്മതിച്ചില്ലേൽ ഞാൻ ചേച്ചിയെ ദേവട്ടൻ്റെ വീട്ടിൽ കൊണ്ടാക്കും. അവിടെ വെച്ചു കല്യാണവും നടത്തും. ദേവേട്ടൻ അതിനുള്ള കാര്യങ്ങൾ ചെയ്തോളും.
അതൊന്നും വേണ്ട…എനിക്ക് ഈ വീട്ടിൽ വച്ച് കല്യാണം നടത്തിതന്നാൽ മതി. അച്ഛൻ്റെ സമ്മതത്തോടെ…അച്ചു നിറകണ്ണുകളോടെ പറഞ്ഞു.
കരയാതെ ചേച്ചി അതാണ് എൻ്റെയും ആഗ്രഹം. വിഷമിക്കേണ്ട അതുപോലെ തന്നെ നടക്കും…ആരുപറഞ്ഞാൽ ആണ് അച്ഛൻ സമ്മതിക്കുക. ശരത്തിന് ആലോചിച്ചിട്ട് ഒരെത്തുംപിടിയും കിട്ടിയില്ല.
*** *** ***
തിരിച്ചു വീടെത്തിയിട്ടും സരസുവിൻ്റെ മനസ്സിൽ ദേവിൻ്റെ മുഖം തെളിഞ്ഞു നിന്നു. എത്ര നല്ല സ്വഭാവം നല്ല വിനയം. ഉച്ചയ്ക്ക് ശശിയ്ക്ക് ഊണുവിളമ്പി കൊടുക്കുമ്പോളും സരസു ദേവിൻ്റെ ഓർമ്മയിലാരുന്നു.
സരസൂ…നീ എവിടാ…?
ങേ…എന്താ ശശിയേട്ടാ…?
എന്തേ ഇത്ര വല്യ ആലോചന. ശരത് പറഞ്ഞതോർത്താണോ. അവൻ പറഞ്ഞത് അവൻ്റെ കാര്യമാ. അവൻ്റെ ചേച്ചിയ്ക്ക് ഈ ചെറുക്കൻ വേണ്ടെന്ന്.
അതൊന്നുമല്ല ശശിയേട്ടാ, ഞാൻ നമ്മുടെ വസുധേച്ചിയുടെ മോനേപ്പറ്റി ഓർത്തതാ. നമ്മൾക്കാണേൽ മക്കളും ഇല്ല. നമുക്കൊരു മോളുണ്ടായിരുന്നെങ്കിൽ ദേവിനെകൊണ്ട് കെട്ടിക്കാരുന്നു.
അസംബന്ധം പറയാതെ സരസു…നീയും വസൂം സഹോദരികളാ, ചേടത്തി അനിയത്തിമാരുടെ മക്കൾ തമ്മിൽ വിവാഹം പാടില്ലാന്നറിയില്ലേ…
ഞാൻ പറഞ്ഞുവന്നത്, അച്ചു നമുക്ക് മോളല്ലേ…അവളെ ദേവിന് ആലോചിച്ചാൽ…
അത് ശരിയാ, മുറപ്പെണ്ണാണ്…അവളോട് ആരു ചോദിക്കും…? ചോദിച്ചാൽതന്നെ സമ്മതിച്ചില്ലെങ്കിലോ…അച്ചൂന് നന്നേ ചേരും.
ശശിയേട്ടൻ ഒന്നുചോദിക്ക്.
ആരോട്, വസൂനോടോ…സരസൂ ആദ്യം നിൻ്റെ ഓപ്പ സമ്മതിക്കേണ്ടേ. ഒരാൾ പറ്റില്ലാ പറഞ്ഞാൽ തീർന്നില്ലേ…അതുകൊണ്ട് ആ ആഗ്രഹം മറക്കാം…ശശി പറഞ്ഞു.
മറക്കാൻ പറ്റുന്നില്ല ശശിയേട്ടാ…നമ്മുടെ കുട്ടികൾ അല്ലേ…അവർ ഒന്നിച്ചാൽ മതിയായിരുന്നു.
ഇത്രയും നേരമായിട്ടും അളിയൻ വിളിച്ചില്ലല്ലോ. എന്തു തീരുമാനിച്ചോ ആവോ…ശശി കൈകഴുകിക്കൊണ്ടിരുന്നപ്പോൾ ഫോൺ ബെല്ലടിക്കാൻ തുടങ്ങി. സരസൂ ആരാന്നു നോക്കൂ…സരസു കോൾ എടുത്തു.
ഹലോ, ശരി വരാം…ഫോൺ കട്ടായി.
തുടരും…
